صلى الله عليه وسلم
Saturday, April 3, 2021
دیکھی نہیں کسی نے اگر شان مصطفی ؐ
دیکھی نہیں کسی نے اگر شان مصطفی ؐ
دیکھے کہ جبرئیل ہے دربانِ مصطفی
لطفِ خدائے پاک کی تصویر کھینچ گئی
پھرنے لگے جب آنکھ میں احسانِ مصطفی ؐ
پھیلا ہوا ہے اسود و احمر کے واسطے
صحنِ عرب میں تابہ عجم خوانِ مصطفی ؐ
اسلام کا زمانہ میں سکہ بٹھا دیا
اپنی مثال آپ ہیں یارانِ مصطفی ؐ
رکھے وہ یاد خسرو پرویز کا مآل
پہنچا ہے جس کے ہاتھ میں فرمانِ مصطفی ؐ
میرے ہزار دل ہوں تصدق حضورؐ پر
میری ہزار جاں ہو قربانِ مصطفی ؐ
رشتہ مرا خدا کی خدائی سے ٹوٹ جائے
چھوٹے مگر نہ ہاتھ سے دامانِ مصطفی ؐ
لائے نہ کیوں نغمہ ملائک کو وجد میں
گاتا ہے جس کو بلبلِ بستانِ مصطفی ؐ
مولانا ظفر علی خان ؒ
Subscribe to:
Comments (Atom)